ယာဉ်တိုက်/တိမ်းမှောက်မှုကြောင့် သေဆုံးနှုန်း သိသိသာသာလျော့ကျ

  ရန်ကုန်မြို့တွင်း၌ယာဉ်တိုက်မှု၊ယာဉ်တိမ်းမှောက်မှုတို့ကြောင့် ဇူလိုင်လအတွင်း လူသေဆုံးမှုမှာ  ယခင်လကထက် လူဦးရေထက်ထက်ဝန်ခန့် လျော့ကျခဲ့ကြောင်း မထသ(ဗဟို)က သိရှိ ရသည်။

 

ဇူလိုင်လတွင် စည်ပင်သာယာနယ်နမိတ်အပြင်ဘက်၌ရွှေပွင့်ဖြူယာဉ်လိုင်းမှာ လမ်းဘေးထိုးကျခဲ့သောဖြစ်ရပ်အပါအဝင် ယာဉ်တိုက်မှု၊ယာဉ်တိမ်းမှောက်မှုမှာ(၂၆)မှုရှိကြောင်းနှင့်(၈၅)ဦးဒဏ်ရာရရှိကာ လူ(၆)ဦးသေဆုံးခဲ့ကြောင်း သိရသည်။

 

ဇွန်လတွင်း၌မူ ယာဉ်တိုက်မှုယာဉ်တိမ်းမှောက်မှုပေါင်း(၃၁)မှုရှိခဲ့ပြီး သေဆုံးသူ(၁၂)ဦးနှင့်ဒဏ်ရာ ရသူ စုစုပေါင်း(၉၇)ဦး အထိရှိခဲ့ကြောင်း သိရှိရသည်။

 

၂ဝ၁၂ခုနှစ် ဇွန်လ(၁)ရက်နေ့မှစ၍ဇူလိုင်လကုန်ထိ ယာဉ်တိုက်မှုနှင့် ယာဉ်တိမ်းမှောက်မှုတို့မှာ (၁၅၆)မှုရှိပြီး ဒဏ်ရာရသူဦးရေမှာ (၄၉၈)ဦးရှိပြီး သေဆုံးသူဦးရေမှာ (၇ဝ)ဦးရှိကြောင်း သိရ သည်။

 

ပြီးခဲ့သည့်နှစ် ၂ဝ၁၁ခုနှစ် တစ်နှစ်လုံး ယာဉ်တိုက်မှု၊ မှောက်မှု (၃၅၈)ကြိမ်ဖြစ်ပွားခဲ့ပြီး ယာဉ် တိုက်မှုကြောင့် လူဦးရေ စုစုပေါင်း (၂၁၃၉)ဦး ဒဏ်ရာရရှိခဲ့ကာ လူဦးရေ(၉၈)ဦး သေဆုံး ခဲ့သည်။

 

ထိုကဲ့သို့ယာဉ်တိုက်မှု၊ယာဉ်တိမ်းမှောက်မှုများ လျော့နည်းစေရန်နှင့်စည်းကမ်းလိုက်နာမှုများတိုးတက်စေရန်ရည်ရွယ်ကာ သင်တန်းများစဉ်ဆက်မပြတ် ပို့ချလျှက်ရှိကြောင်းသိရသည်။

 

“ ကျွန်တော်တို့ ဒီသင်တန်းမှာ မတက်ပဲနေတဲ့ ယာဉ်မောင်းတွေယာဉ်နောက်လိုက်တွေလည်းရှိပါတယ်၊ တက်သွားတဲ့ လူတွေကလည်း နဂိုကထက်ပိုသိသွားကြတယ်’’ ဟု မထသ(ဗဟို)ကော်မတီမှ တာဝန်ရှိသူတစ်ဦးကပြောခဲ့သည်။

 

သြဂုတ်(၁၂)ရက်နေ့တွင်လည်း ယာဉ်လုပ်သားအခြေခံသင်တန်းအမှတ်စဉ်(၁ဝ/၂ဝ၁၂)ကိုဖွင့်လှစ် သွားမည်ဖြစ်ကြောင်းသိရသည်။

 

မထသ (ဗဟို)ကော်မတီ၏ အခြေခံသင်တန်းများအားတက်ရောက်ခဲ့သည့် ယာဉ်လုပ်သားဦးရေမှာ (၈၂၁)ဦးဖြစ်ရှိခဲ့ပြီး မွမ်းမံသင်တန်းအားတက်ရောက်ခဲ့သည့် ယာဉ်လုပ်သားဦးရေမှာ (၆၈၂)ဦး ရှိခဲ့ပြီဖြစ်ကြောင်း မထသ(ဗဟို)က ဆိုသည်။