ဓာတ်ခွဲခန်း၌ အချစ်ကို တိုင်းတာခြင်း

အချစ်နဲ့ပတ်သက်ပြီး လူတွေရဲ့ ခံစားပြုမူပုံတွေကို အဓိပ္ပါယ်ဖွင့်ဆိုရတာ အခက်အခဲဆုံးပညာဖြစ်ပါတယ်။ ဒါပေမယ့် သိပ္ပံ ပညာရှင်တွေဟာ အဲဒီစိန်ခေါ်မှုကြီးကို ရှာဖွေစူးစမ်းခဲ့ရာ ယခုအခါ အဓိပ္ပါယ်ဖွင့်ဆိုလာနိုင်ပြီဖြစ်ပါတယ်။

Rutgers တက္ကသိုလ်မှ မနုသဗေဒပညာရှင် Helen Fisher က ''လူတွေဟာ အချစ်အတွက် ကဗျာတွေစပ်၊ ဝတ္ထုတွေရေး၊ ဝက်ဘ်ဆိုက်တွေ ဖန်တီး ခဲ့ကြပါတယ်။ အချစ်အတွက် ရှင်သန်နေသလို၊ အချစ်အတွက်ကြောင့်လဲ သတ်ကြ ဖြတ်ကြ၊ အသေခံကြပါတယ်။ သူတို့မှာ အသက်ရှင်သန်ဖို့ ရုန်းကန်ရတဲ့စိတ်ဓာတ် အချစ်အတွက် ကြိုးပမ်းတဲ့စိတ်ဓာတ်က ပိုမိုပြင်းထန်နေတတ်တယ်''လို့
ထောက်ပြပါတယ်။


Hawii တက္ကသိုလ်မှ စိတ်ပညာရှင်-Elaine Hatfield နဲ့ Illinois ပြည်နယ် တက္ကသိုလ်မှ လူမှုရေးသိပ္ပံပညာရှင်-Susan Sprecher တို့ နှစ်ဦးဟာ နှစ်နှစ်ကာကာချစ်တဲ့စံနှုန်း Passionate Love Scale နဲ့ ပတ်သက်တဲ့ သုတေသနကို လွန်ခဲ့တဲ့ အနှစ် ၃ဝ က စပြီး လေ့လာခဲ့ပါတယ်။ သူတို့ရဲ့ သုတေသနပြုချက်တွေမှာ အချစ်နဲ့ ပတ်သက်တဲ့ ခံစားချက် ၁၅ မျိုးပါရှိပြီး လူတစ်ယောက်ဟာ အနိမ့်ဆုံး ၁၅ မှတ်ကနေ အမြင့်ဆုံး ၁၃၅ မှတ်အထိ ရရှိနိုင်ပါတယ်။ အဲဒီစမ်းသပ်ချက်ကို အချစ်ရဲ့ သာမိုမီတာ- The Thermometer of Love လို့ တင်စားပြီး ခေါ်ဆိုခဲ့ပါတယ်။ အဲဒီသုတေသနပြု ချက်တွေကို အမေရိကန်နိုင်ငံမှာအပြင် ပစိဖိတ် ကျွန်းစုနိုင်ငံတွေ၊ ရုရှား၊ မက္ကစီ ကို၊ ပါကစ္စတန်နဲ့ အိန္ဒိယနိုင်ငံတွေမှာလဲ ပြုလုပ်ခဲ့ပါတယ်။

စိတ်ပညာရှင်- Elaine Hatfield က 'အနောက်နိုင်ငံတွေမှာသာ တစ်ဦးနဲ့တစ်ဦး နှစ်နှစ် ကာကာ ချစ်ကြပြီး လက်ထပ်ကြတယ်လို့ထင်ကြပေမယ့် လူမျိုးအသီးသီးမှာလဲ အချစ်နဲ့ပတ်သက်လို့ လေးလေးနက်နက်ထားပြီး လက်ထပ် တတ်ကြပါတယ်'လို့ မှတ်ချက်ချထားပါတယ်။

အချစ်နဲ့ပတ်သက်လို့ သိပ္ပံပညာရှင်တွေက နက်နက်နဲနဲ လေ့လာလေလေ သိပ္ပံပညာရဲ့နယ်ပယ်တွေထဲ ပိုပြီးရောက်ရှိလေ့ လာဖြစ်ခဲ့ပါတယ်။ အမြင်ဆိုင်ရာ၊ အကြားဆိုင်ရာ၊ အနံ့ ဆိုင်ရာ၊ ပရိယာယ်ဆိုင်ရာနဲ့ ဓာတုအာ ရုံဖြစ်စဉ်ဆိုင်ရာ စသည်ဖြင့် နယ်ပယ်စုံအထိ ကျယ်ဝန်းခဲ့ပါတယ်။ လူတွေဟာ လူသားမျိုးဆက်ပြန့်ပွားရေး အတွက် မိမိချစ်ခင်တဲ့ ဘဝကြင်ဖော်တွေရှာဖွေကြပါတယ်။ ဒီလိုရှာဖွေကြရမှာ ရှေးအကျဆုံး ဆန္ဒတစ်ခုကတော့ မိမိရဲ့ကြင်ဖော်ဟာ မိမိနှစ်သက်တဲ့ အနံ့အသက်ရှိ၊ မရှိခံစားခြင်းပဲ ဖြစ်ပါတယ်။ တချို့လူတွေဟာ မွေးကတည်းက သူတို့ကိုယ်ပိုင်အနံ့တွေ ပါရှိလာတတ်ပါတယ်။ တချို့အနံ့တွေဟာ ဆန့်ကျင်ဖက်လိင်ကို ဆွဲဆောင်စေနိုင်ပါတယ်။

လူတွေရဲ့ ခန္ဓာကိုယ်တွင်း ရောဂါပိုးကာကွယ်ရေးကို ထိန်းချုပ်တဲ့မျိုးဗီဇ- Genes စနစ်ဖြစ်တဲ့ Major Histocompatibility Complex-MHC ဟာ လူရဲ့ အကြောမျှင်တွေ လှုပ်ရှားမှုအပေါ် အကျိုးသက်ရောက်စေပါတယ်။ လူတွေဟာ မိမိမှာရှိတဲ့ MHC စနစ်နဲ့ မတူတဲ့ ဆန့်ကျင်ဖက်ကြင်ဖော်ကိုသာ ရှာဖွေပြီး ချစ်လေ့ရှိပါတယ်။ MHC တူသူ အချင်းချင်း ရှောင်ကြဉ်တတ်တယ်လို့ UCLA မှ စိတ်ပညာရှင်- Martie Haselton က ဆိုပါတယ်။

ကြွက်တွေနဲ့စမ်းသပ်ခဲ့ရာမှာ MHC တူညီတဲ့ကြွက်ဖိုမတွေဟာ သူတို့ရဲ့ ကျင်ငယ်နံ့ကိုခံပြီး သိရှိနိုင်တဲ့အတွက် တစ်ကောင်နဲ့တစ်ကောင် မိတ်မလိုက် ကြဘူးလို့ သိရပါတယ်။ ဆွီဇာလန်နိုင် ငံ-Bern တက္ကသိုလ်မှာ အမျိုးသမီးတွေကို သူတို့မသိတဲ့ ယောက်ျားတွေရဲ့ စွပ်ကျယ်အင်္ကျီ အပိုင်းအစတွေအား ရွေးချယ်ခိုင်းရာမှာ MHC ခြင်း မတူတဲ့ ယောက်ျားတွေရဲ့ စွပ်ကျယ် အင်္ကျီအပိုင်းအစတွေကိုသာ ရွေးချယ်ခဲ့တယ်လို့ဆိုပါတယ်။

လူတွေဟာ မိမိချစ်ခင်နှစ်သက် တဲ့ မျက်နှာရှိသူနဲ့ လိင်အရဆွဲဆောင်မှု ရှိတဲ့ ကိုယ်ခန္ဓာရှိသူတွေကိုသာ ချစ်သူအဖြစ်ရှာဖွေတတ်ပါတယ်။ ယောက်ျားတွေဆိုရင် ရင်သားနဲ့ တင်ပါးပြည့်ဖြိုးတဲ့ အမျိုးသမီးတွေကို ရင်သွေးတွေ ကျန်းမာစွာမွေးဖွားပေးနိုင် ပြီး ကြီးပြင်းလာအောင် ပြုစုထိန်း သိမ်းပေးနိုင်သူတွေလို့ မြင်ကြပါ တယ်။ အမျိုးသမီးတွေကလဲ ပခုံးနဲ့ ရင်အုပ်ကျယ် တဲ့ ယောက်ျားတွေ ကို အစားအစာ ရှာဖွေပေးနိုင်သူဖြစ်ပြီး ဘေးအန္တရာယ်က စောင့်ရှောက်ပေးနိုင်တယ်လို့ ယူဆကြပါတယ်။ လေးနက်တဲ့စကားသံရှိသူတွေကိုလဲ ဆွဲဆောင်မှုရှိတဲ့သူတွေလို့ မှတ်ယူကြပါတယ်။

နှုတ်ခမ်းနဲ့နမ်းခြင်း- Kissing ဟာ MHC ကို စမ်းသပ်ခြင်းတစ်မျိုး ဖြစ်သလို တခြားဆွဲဆောင်မှုအမှတ် လက္ခဏာတွေလဲ ဖြစ်ပေါ်စေပါတယ်။ စိတ်ပညာရှင်- Gordon Gallup က ''နှုတ်ခမ်းနဲ့ နမ်းနေစဉ်အတွင်း အချစ် နဲ့ ပတ်သက်တဲ့ရုပ်နဲ့ ဓာတုဗေဒ ပြောင်းလဲမှု သတင်းအချက်အလက် အများအပြားကို ဖြစ်ပေါ်စေပါတယ်။ နီးစပ်မှုပိုဖြစ်စေပြီး အချစ်ကို လက်ခံလို စိတ်ဖြစ်ပေါ်စေပါတယ်'' လို့ ပြော ပါတယ်။

စိတ်ပညာရှင်- Martie Haselton က ''နှုတ်ခမ်းနဲ့ နမ်းခြင်းဟာ အချစ်ရဲ့အရသာကို စမ်းသပ်တဲ့ နည်းလမ်းတစ်ခုပဲဖြစ်တယ်'' လို့ ဆိုပါ တယ်။

နောက်ဆုံး မိမိ ရိုးမြေကျ ချစ်ရမယ့်သူလို့ သိလိုက်တဲ့အချိန် (အချစ် စစ်အချစ်မှန်ကို တွေ့ရှိလိုက်ရတဲ့ အချိန်)မှာ ဦးနှောက်ထဲက ရုတ်တရက်ဖြစ်ပေါ်လာတဲ့ သံလိုက်ဓာတ် လှုပ်ရှားမှုပုံရိပ်တွေ- Functional Magnetic Resonance Imagers-FMRIS ကို ကောင်းစွာ ခံစားရပါတယ်။ အချစ်ကြောင့် ဦးနှောက်တွင်း FMRIS ဖြစ်ပေါ်လာမှုကို ၂ဝဝဝ ပြည့် နှစ်လောက်ကတည်းက သိပ္ပံပညာရှင်တွေက တွေ့ရှိခဲ့ပါတယ်။ အဲဒီ အချစ်မေတ္တာစိတ်ဟာ ဦးနှောက်ရဲ့ နေရာသုံးနေရာမှာ တစ်ပြိုင်နက် ဖြစ်ပေါ်ခဲ့တယ်လို့ ဆိုပါတယ်။ ပထမ တစ်နေရာက ဦးနှောက်ရဲ့ အောက်ပိုင်းမှာရှိတဲ့ အာရုံကြောတွေပဲဖြစ်ပါတယ်။ အဲဒီအာရုံကြောတွေက နောက်ဆုံးဆုရလာဒ်ကို ကြော်ငြာပေးသလိုခံစားစေပါတယ်။
မနုသဗေဒ ပညာရှင် - Helen Fisher နဲ့ အဖွဲ့ဟာ အချစ်စစ်ကို စတင်ခံစားရသူတွေရဲ့ ဦးနှောက်တွေကို ကွန်ပျူတာနဲ့ လေ့လာခဲ့ရာမှာ သူတို့ဦးနှောက်ရဲ့ အောက်ပိုင်းအာရုံကြောတွေဟာ ပြင်း ထန်စွာလှုပ်ရှားနေတာကို တွေ့ရတယ်လို့ပြောပါတယ်။

သူမက ''ဦးနှောက်အောက်ခြေက အာရုံကြောတွေဟာ တခြားအဆင့်မြင့် ဦးနှောက်ရဲ့ အစိတ်အပိုင်းတွေကို တတ်မက်မှု၊ လှုံ့ဆော်မှုနဲ့ နောက်ဆုံး အောင်မြင်မှု ရရှိခဲ့တဲ့ အမူအယူမျိုးတွေကို သတင်း ပို့လွှတ်တယ်''လို့ ရှင်းလင်းပြောကြားပါတယ်။

ဦးနှောက်မှာ အချစ်သတင်း ရောက်ရှိတဲ့နောက်ဆုံး နေရာကတော့ ဦးခေါင်းခွံအောက် တစ်ဘက် တစ် ချက်မှာရှိတဲ့ ပုစွန်ကွေးပုံသဏ္ဌာန် ဦးနှောက်အာရုံကြော အစိုင်အခဲကြီး နှစ်ခုပဲဖြစ်ပါတယ်။ အဲဒီအာရုံကြော အစိုင်အခဲကြီးတွေထဲမှာ မော်တော်ကားကို ဘယ်လိုမောင်းရတယ်၊ ကွန်ပျူတာကို ဘယ်လိုနှိပ်ရတယ် စတဲ့ အသိဥာဏ်မျိုးစုံတွေကို သို လှောင်ထားရှိပါတယ်။ အဲဒီ သိုလှောင်ထားရှိတဲ့ အသိဥာဏ်၊ ပညာတွေကို အချိန်မရွေး မှတ်မိပြီး ထုတ်ယူအသုံး ပြုနိုင်ပါတယ်။ အချစ်စိတ်ကိုလဲ အဲဒီ အာရုံကြောအစိုင်အခဲကြီးထဲမှာ သို လှောင်ထားတဲ့အပြင် ပိုမိုပြီးအား ကောင်း ပြင်းထန်လာအောင်လဲ လုပ်ပေးနိုင်ပါတယ်။

နယူးယောက်ပြည်နယ် တက္ကသိုလ်မှ စိတ်ပညာရှင်-Arthur Aronက ''အရေးအခင်းအကျပ် အတည်း တစ်ခုခု၊ ဒါမှမဟုတ် မတော်တဆ အဖြစ်အပျက်တစ်ခုခု၊ ဥပမာ-လေယာဉ်ပျက်လို့ အရေးပေါ် ဆင်းသက် ရမှုမျိုးတွေမှာ ဆုံတွေ့ရပြီး တစ်ဦးနဲ့တစ်ဦး ကူညီစောင့်ရှောက်ခဲ့သူ အချင်းချင်း ချစ်ကြိုက်မိခဲ့ရင် ပိုပြီး တွယ်တာမှုရှိတတ်တယ်'' လို့ ပြောပါ တယ်။ Concordia တက္ကသိုလ်မှ စိတ်ပညာရှင် Jim Pfaus က ''သင်ရဲ့ပတ်ဝန်း ကျင်မှာရှိတဲ့သူတွေထဲက သင်နှစ် သက်တဲ့ အရည်အချင်း ရှိသူကို ရှာဖွေ ပြီးချစ်မိတာပဲဖြစ်ပါတယ်။ အဲဒီ ချစ်တဲ့ စိတ်ကို သင်ရဲ့ဦးနှောက်က ဆုံးဖြတ်ပြီးအသိပေးပါတယ်''လို့ ဆိုကြောင်းပါခင်ဗျား။

Ref: "The Science of Romance" Bt Jeffrey Kluger (Time)

ညွှန်း - ဈေးကွက်ဂျာနယ် zaygwet.com

မောင်ပုဆိုးကြမ်း

from The Irrawaddy's Blog by zarny win