ဧဒင်အချစ်ပုံပြင်: မုဒုံမြို့ ကန်ကြီးကန် ပြုပြင်ထိန်းသိမ်းရန်လို

Friday, 26 April 2013

မုဒုံမြို့ ကန်ကြီးကန် ပြုပြင်ထိန်းသိမ်းရန်လို

ကန်ကြီး စေတီတော်ဟာ မွန်ပြည်နယ် မုဒုံမြို့ မှာရှိတဲ့ သမိုင်းဝင် ဆံတော်ရှင် စေတီတစ်ဆူ ဖြစ်ပါတယ် ။ မုဒုံမြို့ဆိုတာကို မုဒုံစောင်ဆိုတဲ့ ဒေသထွက် ယက္ကန်း ထည်လေးနဲ့ တွဲပြီး သိကြသလို ကန်ကြီး စေတီတော် ၊ ကန်ကြီးကန် တွေနဲ့ ယှဉ်တွဲပြီး လည်း လူသိများ ထင်ရှား ပါတယ် ။


လက်ရှိ မုဒုံ ကန်ကြီးစေတီတော်ဟာ ( ၄.၆၂ ) ဧက ကျယ်တဲ့ မဟာရာမ် တံတိုင်း အလယ်မှာ ရှိပြီးတော့ ညဏ်တော် အမြင့် (၈၉)တောင် ၊ ဖိနပ်တော် အ၀န်း (၄၁၈)တောင် ရှည်လျားပြီး အုတ် အင်္ဂတေ တို့ဖြင့် လက်ရာ ပြောင်မြောက်စွာ တည်ထားတဲ့ စေတီတော် ဖြစ်ပါတယ် ။ သမိုင်းအထောက် အထားများအရ မြတ်စွာဘုရား သက်တော်ထင်ရှား ရှိစဉ်အခါကတည်းက မြတ်စွာဘုရားရဲ့ ဆံတော်ရှင်ကို ထည့်သွင်း ဌာပနာပြီး ဂ၀ံအုတ်တို့နဲ့ စတင် တည်ထားခဲ့ကာ နောင်အခါမှ လက်ရှိ စေတီတော်အတိုင်း ပြုပြင်တည်ထား ခဲ့တယ်လို့ သိရှိရပါတယ် ။

ကန်ကြီးစေတီတော် နဲ့ ကပ်လျက်မှာတော့ သဘ၀အတိုင်း ကြည်လင်စိမ်းမြနေတဲ့ ရေပြင်ရှိတဲ့ ကန်ကြီးကန် တည်ရှိပါတယ် ။ ထူးခြားမှု ကတော့ ကန်ကြီးကန်ရဲ့ ရေပြင်ဟာ နောက်ကျိမှု မရှိပဲ အမြဲတမ်း ကြည်လင် နေခြင်းပဲ ဖြစ်ပါတယ် ။  မြန်မာ နှစ်ဆန်း (၁) ရက်နေ့ညမှာ ဆီမီး (၉၀၀၀) ပန်း (၉၀၀၀) ဗုဒ္ဓပူဇနိယ ပူဇော်ပွဲကို ဒီ ကန်ကြီးစေတီတော် ပရ၀ုဏ်အတွင်းမှာ ကျင်းပကြသလို ကန်ကြီးကန် အတွင်းမှာလည်း ဆီမီးမျှောပွဲကို ကျင်းပပူဇော် ကြပါတယ် ။

သမိုင်းဝင် ဆံတော်ရှင် ကန်ကြီးစေတီတော် နဲ့ ကန်ကြီးကန် ရှိရာကို အနယ်နယ် အရပ်ရပ်က ဘုရားဖူးတွေ စဉ်ဆက်မပြတ် လာရောက် ဖူးမျှော်လျှက် ရှိကြသလို နိုင်ငံတကာမှ ဘုရားဖူးများလည်း  လာရောက် ဖူးမျှော်လျှက် ရှိပါတယ် ။ တကယ်တော့ သမိုင်းဝင် ဆံတော်ရှင် ကန်ကြီးစေတီတော် နဲ့ ကန်ကြီးကန်ဟာ မုဒုံမြို့ရဲ့ ပြယုဒ် တစ်ခုလို့ ဆိုနိုင်သလို မြို့ရဲ့ အလှတရား ဘာသာတရားရဲ့ ငြိမ်းချမ်းတဲ့ အလှတရားတခုလို့ လည်း ဆိုနိုင်ပါတယ် ။

ကန်ကြီးစေတီတော် ကန်ကြီးကန်နဲ့ ပါတ်သက်ပြီး ဗုဒ္ဓဘာသာဝင် မြို့သူမြို့သားတွေ ဂုဏ်ယူနိုင်ကြပေမယ့် ကန်ကြီးစေတီတော် ၀န်းကျင်မှာ အမှိုက်တွေ ပလပ်စတစ်တွေ ပေါများလာမှု  နဲ့ ကန်ကြီးကန် တဖြည်းဖြည်း ကောလာမှု အခြေအနေ တွေကတော့ တစ်နေ့တစ်ခြား ပိုမို ဆိုးရွားလာနေတာကို စိတ်မကောင်းစွာ တွေ့ရှိနေ ရပါတယ် ။

မုဒုံမြို့ ကန်ကြီးစေတီတော် ၀န်းကျင်မှာ ကန်ကြီးစေတီတော်ကို လာရောက် ဖူးမျှော်တဲ့ ဘုရားဖူးများ နားနေ နိုင်ရန် စားသောက်နိုင်ရန်အတွက် ဘူးသီးကြော် အသုတ် အအေးစုံ စတဲ့ ဆိုင်များကို သက်သာတဲ့ ဆိုင်ခန်းဌားခ နှုန်းထားများနဲ့ ဖွင့်လှစ်ခွင့် ပေးထားပါတယ် ။ ဆိုင်ခန်းတွေ ဖွင့်လှစ်ပေးထားတဲ့ အတွက် ဘုရားဖူးလာရောက်သူများ အတွက် အဆင်ပြေတာ ကိုလည်း တွေ့ရှိရပါတယ် ။
ဒါပေမယ့် အဲဒီဆိုင်ခန်းတွေက ထွက်ရှိလာတဲ့ ကြံဖတ်များ ပလတ်စတစ်များ အမှိုက်များ ကို စနစ်တကျ သိမ်းဆည်းမှု နဲ့ စနစ်တကျ စွန့်ပစ်မှု မရှိတဲ့ အတွက် ဘုရားပရ၀ုဏ် ၀န်းကျင်မှာ အမှိုက်များ ပလတ်စတစ်များ ပြန့်ကျဲနေတာကို တွေ့ရှိရပါတယ် ။ အမှိုက်သိမ်းကားများ အလှည့်ကျ ၀င်ရောက် သိမ်းဆည်းပေမယ့် စနစ်တကျ ထုတ်ပိုးထားရှိမှု ၊ စနစ်တကျ စုပုံထားရှိမှု မရှိတဲ့ အပြင် အမှိုက်သိမ်း ၀န်ထမ်းများကလည်း အမှိုက်များကို ကုန်စင်အောင် ရှင်းလင်း တင်ဆောင် သွားခြင်း မရှိတဲ့အတွက် အမှိုက်များ က တနေ့တခြား ပိုမို ဆိုးဝါးစွာ ပြန့်ကျဲ လာတာကို တွေ့မြင်ရပါတယ် ။ ပရဟိတ အဖွဲ့များ စုပေါင်း အမှိုက်ကောက်ခြင်း အမှိုက်သိမ်းဆည်း ခြင်းများ လုပ်ဆောင် ကြပေမယ့် စနစ်တကျ စွန့်ပစ်မှု မရှိတဲ့ အတွက် သိမ်းဆည်း ချိန် ခဏသာ ရှင်းလင်းသွားတာကို တွေ့မြင် ရပြီးတော့ အချိန်တိုအတွင်းမှာပဲ အမှိုက်များ ပြန်လည် ပြန့်ကျဲ လာပြန်ပါတယ် ။

ဒါ့အပြင် တချို့ဆိုင်တွေ အနေနဲ့ မိမိတို့ရဲ့ အမှိုက်တွေကို ကန်ကြီးကန်ထဲ မှာ စွန့်ပစ်ခြင်း လုပ်လာတဲ့ အတွက် ကြည်လင် သန့်ရှင်းနေတဲ့ ကန်ကြီးကန် ရေပြင်ဟာ အဲဒီဈေးဆိုင်တန်း အနီးပါတ်ဝန်းကျင်တ၀ိုက်မှာ သန့်ရှင်းမှု မရှိ ညစ်ညမ်း နောက်ကျိလာပြီး ကန်လည်း တဖြည်းဖြည်း ကောလာတာကို တွေ့ မြင်နေရပါတယ် ။ ပြီးတော့ ကန်ကြီးကန်ဟာ ရေသေကန် တစ်ခုဖြစ်တာနဲ့ အညီ တခြားတခြားက စီးဝင်လာတဲ့ ရေထဲမှာ ပါဝင်လာတဲ့ အမှိုက် တွေ အနည်တွေနဲ့ ကန်ကလည်း တနေ့တခြား ကောလာပါတယ် ။

အရင်တစ်ချိန်က လူတစ်ရပ်သာသာလောက် အနက်ရှိတဲ့ နေရာတစ်ချို့မှာ အခုဆိုရင် ကုန်းပြင်လုံးလုံး ဖြစ်လာနေပါပြီ ။ ရာသီဥတု ပြောင်းလဲမှု မြေအောက်ရေ ပြောင်းလဲမှုတွေ ကြောင့် ကန်ကောလာနိုင်သလို လူတွေရဲ့ စည်းကမ်းမဲ့ စွန့်ပစ်တဲ့ အမှိုက်များ နဲ့ ပေါင်းဆုံသွားတဲ့ အတွက် အချိန်မီ ပြုပြင်ထိန်းသိမ်းမှု မရှိခဲ့ရင် ကန်ကောလာမှုဟာလည်း အချိန်တို အတွင်းမှာ အဆိုးဝါးဆုံး အခြေအနေကို ဆိုက်ရောက်သွားနိုင် ပါတယ် ။

တကယ်တော့ ကန်ကြီးစေတီတော် နဲ့ ကန်ကြီးကန်ဆိုတာ မုဒုံမြို့ရဲ့ ကျက်သရေဆောင် တစ်ခု ဖြစ်ပါတယ် ။ မြို့ရဲ့ ပြယုဒ်တစ်ခု ဖြစ်သလို ဘာသာတရား ရဲ့ မှတ်ကျောက် တစ်ခုလည်း ဖြစ်ပါတယ် ။ တစ်နေ့တခြား များပြားလာနေတဲ့ အမှိုက်များ ပလတ်စတစ်များ ၊ ဆိုင်ခန်းများမှ အမှိုက်များကို စည်းကမ်းမဲ့ စွန့်ပစ်နေမှုများ ကြောင့် ကန်ကြီးစေတီတော်ရဲ့ ၀န်းကျင် သန့်ရှင်းမှု ၊ ကန်ကြီးကန်ရဲ့ ရေရှည် တည်တဲ့မှုကို များစွာ ထိခိုက်မှု ဖြစ်စေပါတယ် ။ 

အဲဒီတော့ သမိုင်းဝင် ဆန်တော်ရှင် ကန်ကြီးစေတီတော် ပရ၀ုဏ်နဲ့ ပါတ်ဝန်းကျင် သန့်ရှင်း သပ်ရပ်နေစေရေး  နဲ့ ကန်ကြီးကန် အစဉ်ကြည်လင် အေးမြ သန့်ရှင်းနေပြီး တဖြည်းဖြည်းကောလာခြင်း ဖြစ်စဉ်တွေကို ကန်ကြီးစေတီတော် ဂေါပက အဖွဲ့ဝင်များ ၊ မြို့သူမြို့သားများ ၊ တာဝန်ရှိသူများ အားလုံး ၀ိုင်းဝန်း ကာကွယ်ဖို့ လိုနေပါပြီ ။ စုပေါင်း ကာကွယ် ထိန်းသိမ်းခြင်း မလုပ်ပါက နောငတစ်ချိန် မှာ ပြုပြင်ထိန်းသိမ်းရ ခက်ခဲတဲ့ အနေအထားကို အချိန်တို အတွင်း ရောက်ရှိသွား တော့မှာ ဖြစ်ပါတယ် ။
ဘုရားဝင်း တာဝန်ရှိသူများ အနေနဲ့လည်း ဈေးဆိုင်တန်းများကို အမှိုက်များ စနစ်တကျ စွန့်ပစ်စေရေး ညှိနှိုင်းဆွေးနွေးခြင်း ၊ ဘုရားပွဲတော် အတွင်း အမှိုက်များကို စနစ်တကျ စွန့်ပစ်မှု ရှိစေရေး ၊ ပွဲတော်ချိန်တွင်း ရွေ့ပြောင်း ဈေးဆိုင်များအား အမှိုက်များကို စနစ်တကျ စွန့်ပစ်မှု ရှိရေး စတာတွေကို အမြန်ဆုံး ဆောင်ရွက် သင့်နေပါပြီ ။

မြို့သူ မြို့သားများ ၊ တာဝန်ရှိသူများ အနေနဲ့လည်း မြို့ရဲ့ ကျက်သရေဆောင် ကန်ကြီးစေတီတော် ၀န်းကျင် မှာ အမှိုက်များ ပလတ်စတစ်များ သန့်ရှင်း လာစေအောင် ပါဝင်ကူညီခြင်း ၊ ကန်ကြီးကန်အတွင်း အမှိုက်များ စွန့်ပစ်မှု ကို စနစ်တကျ တားဆီးကာကွယ်ခြင်း ၊ ကန်တဖြည်းဖြည်း ကောလာမှု ကို အမြန်ဆုံး ပြန်လည် ထိန်းထိမ်းမှုများ ဆောင်ရွက်ခြင်းတို့ကို စုပေါင်း လုပ်ဆောင်ကြဖို့ လိုနေပြီ ဖြစ်ပါကြောင်း တိုက်တွန်း ရေးသား လိုက်ရပါတယ် ။

မုဒုံသား









http://feeds.feedburner.com/thithtoolwin/yIWV

No comments:

Post a Comment

Related Posts Plugin for WordPress, Blogger...