လူမှုရေးလုပ်ငန်းတွေ လုပ်ဦးမည့် ဂစ်တာသမား

မြန်မာနိုင်ငံ၏ အအောင်မြင်ဆုံး တေးဂီတဝိုင်း တစ်ဝိုင်းဖြစ်သည့် Iron Cross တီးဝိုင်း၏ Lead ဂစ်တာသမားတစ်ဦးအဖြစ် နှစ်ပေါင်းများစွာ အောင်မြင်မှု ရရှိထားသူ၊ လူမှုရေးလုပ်ငန်းများလည်း လုပ်ဆောင် သွားဦးမည့်သူမှာ ချစ်စမ်းမောင်ဖြစ်သည်။

သူ့ကို ဧရာဝတီတိုင်းဒေသကြီး ဟင်္သာတမြို့နယ်၊ နွယ်ခွေ ကျေးရွာတွင် သင်းအုပ်ဆရာဖခင်နှင့် သာမန်အိမ်ရှင်မတစ်ဦး ဖြစ်သော မိခင်တို့မှ မွေးဖွားခဲ့သည်။ မွေးချင်းမောင်နှမ ငါးဦးရှိပြီး သူကအငယ်ဆုံးသား ဖြစ်သည်။ ဘဝတွင် ဂစ်တာသမားတစ်ဦးအဖြစ် အောင်မြင်မှု ရရှိနေခြင်းမှာ ဘုရားပေးသော ပါရမီကြောင့်ဟု ယူဆကြောင်း သူကဆိုသည်။

လေးနှစ်သားတွင် ဂစ်တာစတီး

ခရစ်ယာန် ဘာသာဝင် အသိုင်းအဝိုင်းတွင် မွေးဖွားခဲ့ခြင်းကြောင့် ဂီတနှင့် မစိမ်းသလို၊ အစ်ကိုဖြစ်သူများ ကလည်း အိမ်တွင် ဂစ်တာများ တီးခတ်နေခြင်းကြောင့် ငယ်စဉ်ကတည်းက ဂစ်တာနှင့် သူထိတွေ့ခဲ့ရပြီး လေးနှစ်သားအရွယ်ကပင် ဂစ်တာစတင် တီးခတ်ခဲ့သည်ဟု သူကဆိုသည်။ သူ့ကိုဂစ်တာ တီးခတ်တတ်အောင် စတင် သင်ကြားပေးခဲ့သူများမှာ သူ့အစ်ကိုနှစ်ဦးဖြစ်ပြီး အစ်ကိုများ ဂစ်တာတီးပြီး ချထားပါက သူကောက်ကိုင်ပြီး လျှောက်တီးလေ့ရှိသည်။

သူငယ်တန်း ကျောင်းသားအရွယ် မိဘဆရာ ကန်တော့ပွဲတွင် သူနှင့်ရွယ်တူ ကလေးများနှင့် ဂစ်တာ တီး၍ သီဆိုဖျော်ဖြေခဲ့ဖူးသလို တတိယတန်း ကျောင်းသားအရွယ်တွင်လည်း သူဂစ်တာတီးတတ် သည်ကိုသိသော သူတို့ရွာတွင် ဒုံမင်းတီး ဦးအောင်သန်းနှင့်အတူ မင်္ဂလာဆောင်နှင့် အလှူပွဲများကို သူလိုက်လံ တီးခတ်ခဲ့ဖူးသည်။ ထိုစဉ်က တစ်ညကို ၁၀ ကျပ်ရသည်ဟု သူကပြောပြသည်။ ပဉ္စမတန်း ကျောင်းသားအရွယ်တွင်လည်း သီချင်းဆိုချင်သော သူငယ်ချင်းများကြောင့် နယ်မြို့များတွင် သူလိုက်လံ ဖျော်ဖြေခဲ့ဖူးသည်။

ဆရာကောင်းနှင့် တွေ့ခဲ့တယ်

သူဂစ်တာတီး ဝါသနာပါသည်ကို သိသည့် ရန်ကုန်မြို့ရှိ ဆည်မြောင်းဦးစီးဌာနတွင် အလုပ်ဝင်နေ သော အစ်မဖြစ်သူက ဆယ်ရက်ကြာ ဂစ်တာသင်တန်းတစ်ခုကို တက်ရောက်ရန်အတွက် သူ့ကိုရန်ကုန်မြို့သို့ ခေါ်ခဲ့သည်။ ရန်ကုန်မြို့ရှိ MYC ဘုရားကျောင်းတွင် တက်ရောက်ရသည့် ဆယ်ရက်ကြာ ဂစ်တာသင်တန်း၌ သူ့ဘဝ၏ လက်ဦးဆရာဖြစ်သည့် ဂစ်တာပညာရှင် စောဘွဲ့မှူးနှင့် သူတွေ့ကြုံခဲ့ရသည်။ စောဘွဲ့မှူးနှင့် တွေ့ဆုံပြီးနောက်တွင် ဂစ်တာပညာကို ပိုမိုရူးသွပ်လာခဲ့သည်ဟု သူကပြောပြသည်။

ဂစ်တာသင်တန်းကို ဆယ်ရက်ကြာ တက်ရောက်ပြီးနောက်တွင် နယ်သို့ သူတစ်ခေါက်ပြန်ခဲ့ရသည်။ နယ်သို့ ပြန်ရောက်သော အခါတွင်လည်း စားလို့မဝင်၊ အိပ်လို့မပျော်ဘဲ ဂစ်တာပညာကိုသာ တစ်ချိန်လုံး လေ့လာဆည်းပူးချင်နေသော သူ့ကို ကြည့်ပြီး စိတ်မကောင်း ဖြစ်နေသော မိဘများက ရန်ကုန်ရှိ အစ်မထံသို့ ပြန်လည် စေလွှတ်ပြီး သူလိုအပ်သမျှကို တတ်နိုင်သမျှ ပံ့ပိုးပေးမည်ဟု ပြောကြားသည့်အတွက် ရန်ကုန်သို့ သူပြန်လာခဲ့သည်။

ရန်ကုန်သို့ နောက်တစ်ကြိမ် ပြန်လည် ရောက်ရှိလာသော အခါတွင် စောဘွဲ့မှူးနှင့် သူပိုမိုရင်းနှီးခင်မင် လာခဲ့သည်။ ထိုစဉ်က စောဘွဲ့မှူးမှာ ဆေးဖြတ်ခါစ ဖြစ်သည့်အတွက် ဂစ်တာသိပ်မတီး နိုင်သော်လည်း သူ့ကို အမြဲလိုလို အားပေးလေ့ရှိသလို သူကလည်း တလေးတစား ဆက်ဆံပြီး ဝေယျာဝစ္စများ လုပ်ပေးခဲ့သည်ဟု သူကဆိုသည်။

စောဘွဲ့မှူး ဆေးဖြတ်ပြီးနောက်အပြင် Recording များတွင် ဂစ်တာ သွားရောက်တီးသောအခါ သူ့ကိုလည်း ခေါ်ဆောင်သွားခဲ့ပြီး အခွင့်အရေးရလျှင် ရသလို သူ့ကိုလည်း ပေးတီးခဲ့သည်။ ထိုစဉ်က အများဆုံး တီးပေးခဲ့ရသည်မှာ ဂီတလုလင် ဦးကိုကို၏ ရုပ်ရှင်ဇာတ်ကားများဖြစ်ပြီး ထိုသို့တီးခတ်မှုက အတွေ့အကြုံများစွာ ရစေခဲ့ကြောင်း သူကပြောပြသည်။ “ကိုယ်သူ့ကို ကျေးဇူးတင်ရမှာတစ်ခုက တေးသံရှင် စိုးလွင်လွင်ရဲ့ မာနမျက်နှာစီးရီး တစ်ခွေလုံးကို သူ Solo တီးထားတာကို ဖျက်ပြီး ကျွန်တော့်ကို အသစ်ပြန်တီးခိုင်းတယ်။ ဒီစီးရီးက ကျွန်တော့် ပထမဆုံး ဂစ်တာသမား ဘဝအစမှာ တီးခဲ့ရတဲ့ စီးရီးပါ။ အဲဒီခေတ်တုန်းက စတူဒီယိုမှာ Day Duty တစ်ခုလုံးယူပြီး သီချင်းသွင်းမယ်ဆို လေး၊ ငါးခြောက်ပုဒ်လောက် သွင်းလို့ရတဲ့ခေတ်မှာ ကျွန်တော်က ဂစ်တာ Solo သက်သက်ကို တစ်နေ့လုံး အချိန်ယူပြီး တီးတယ်။ ကျွန်တော့်ကို ဖြစ်စေချင်တော့ အားလုံးကလည်း အားပေးတယ်။ Day Duty တစ်ခုလုံးကို ကျွန်တော်တစ်ယောက်တည်း တီးတာဆိုတော့ ကုန်ကျစရိတ် အများကြီး ရှိပေမယ့် ဒီနေ့မပြီးလည်း ပြဿနာ မရှိဘူးဆိုပြီး ဆရာစောဘွဲ့မှူးက အားပေးခဲ့တယ်။ ဆရာနဲ့ကျွန်တော်က နောက်ပိုင်း သားအဖလို ဖြစ်သွားတယ်။ သူကလည်း အိမ်မပြန်တော့ဘူး။ ဘုရားကျောင်းမှာပဲ နေတယ်။ ကျွန်တော်ကလည်း ကျောင်းဆင်းတာနဲ့ ကျောင်းစိမ်းနဲ့လာပြီး ဂစ်တာလာတီးတယ်” ဟု စောဘွဲ့မှူးနဲ့ ပတ်သက်သည့် အမှတ်တရ အဖြစ်အပျက်ကို သူက ပြောပြသည်။

Iron Cross

စောဘွဲ့မှူးနှင့်အတူ အပြင် Recording များတွင် သူလိုက်လံ တီးခတ်ခဲ့သလို နောက်ပိုင်းတွင် စောဘွဲ့မှူးကိုယ်တိုင် တည်ထောင်ခဲ့သော Symphony တီးဝိုင်းအပြင် New Waves နှင့် Success တီးဝိုင်းများတွင် သူတီးခတ်ခဲ့သည်။

အကြောင်းအမျိုးမျိုးကြောင့် Symphony တီးဝိုင်းကို ဖျက်သိမ်းခဲ့ပြီးနောက်တွင် စောဘွဲ့မှူးက သူအပါအဝင် New Waves တီးဝိုင်းမှ ကိုခရမ်းနှင့် ကိုခင်မောင်သန့်၊ မိုးသောက်ပန်း တီးဝိုင်းမှ ကိုဗညားနိုင်တို့ကို စုစည်း၍ Iron Cross တီးဝိုင်းကို စတင်တည်ထောင်ခဲ့သည်။ Iron Cross တီးဝိုင်းမှာ စတင်တည်ထောင်ပြီး သော်လည်း နာမည်သာရှိပြီး သူမှလွဲ၍ တီးဝိုင်းရှိ အခြားသူများမှာ အပြင် Recording များတွင် လိုက်လံ တီးခတ်သောကြောင့် တီးဝိုင်းတွင် သူတစ်ယောက်တည်းလိုလို ကျန်နေခဲ့သည်။ ထို့ကြောင့် တီးဝိုင်း ရပ်တည်ရှင်သန်ရန်အတွက် Iron Cross တီးဝိုင်း၏ မန်နေဂျာဖြစ်သူ ဒေါက်တာကိုကိုလွင်က အဖွဲ့သားများကို အစည်းအဝေးတစ်ခု ခေါ်ယူ၍ တိုင်ပင်ခဲ့ သည်။ အများသဘောတူညီချက်ဖြင့် Iron Cross တီးဝိုင်းကို အလုပ်အပ်နှံမှု မရှိပါက အပြင် Recording များကို လိုက်မတီးဘဲ ဒီအတိုင်းသာနေရန် ဆုံးဖြတ်ခဲ့သည်။

Iron Cross တီးဝိုင်းကို စတင်တည်ထောင်စ ကာလများတွင် လူအများက တီးဝိုင်းကို စောဘွဲ့မှူးတီးဝိုင်း ဟုသာ လူသိများခဲ့သည်။ ၁၉၉၂ ခုနှစ်တွင်နယ်မှ ရန်ကုန်သို့ စီးရီးသွင်းရန် ဆင်းလာသော တေးသံရှင် လေးဖြူနှင့် Iron Cross တီးဝိုင်းတို့ ပူးပေါင်းမိပြီး နောက်ပိုင်းတွင် တီးဝိုင်းမှာ ပိုမိုအောင်မြင်ခဲ့သည်။ ထို့ပြင် Iron Cross တီးဝိုင်းအောင်မြင်မှု အတွက် ကျေးဇူးတင်ရမည့်သူမှာ ထိုစဉ်က သရုပ်ဆောင် အဖြစ်သာမက တေးသံရှင်အဖြစ်ပါ အောင်မြင်မှု ရနေသော စိုးသူဖြစ်ပြီး သူသီဆိုသော စင်မြင့်ဖျော်ဖြေပွဲ တိုင်းတွင် Iron Cross တီးဝိုင်းကို လက်တွဲခေါ်ယူခဲ့သည်ဟု သူကပြောပြသည်။

ယခုအခါ Iron Cross တီးဝိုင်းမှာ မြန်မာနိုင်ငံ၏ အအောင်မြင်ဆုံး တီးဝိုင်းဖြစ်နေသလို သူ့ကိုလည်း အတော်ဆုံး ဂစ်တာပညာရှင် တစ်ယောက်အဖြစ် အသိအမှတ်ပြု ခံနေရပြီ ဖြစ်သော်လည်း ယခုကဲ့သို့ အနေအထားမျိုး ရောက်ရှိရန် အခက်အခဲများစွာ တွေ့ကြုံခဲ့ရသည်ဟု သူကပြောပြသည်။

“ဘဝစတာကတော့ သုညကစတာပဲ။ ငယ်ငယ်က သီချင်းနားထောင်ချင်ရင်တော့ ကက်ဆက် မရှိတော့ လက်ဖက်ရည်ဆိုင်တွေမှာ နားထောင်ရတယ်။ လက်ဖက်ရည်ဆိုင် ထိုင်ရတာလည်း သိပ်ဝါသနာ မပါဘူး။ သီချင်းနားထောင်ချင်လို့သာ သွားတာ။ နောက်ပိုင်း ဂစ်တာတီးကျင့်ဖို့ အတွက် ကက်ဆက် အစုတ်ကလေး တစ်ခုကို ဝယ်ပြီးနားထောင်ရတယ်။ တော်တော့်ကို မပြည့်မစုံနဲ့ ဖြတ်သန်းလာခဲ့ရတယ်” ဟု သူက ပြောပြသည်။

ကိုယ်တိုင် ဆက်လေ့လာတယ်

Iron Cross တီးဝိုင်းဖွဲ့ပြီး နောက်ပိုင်းတွင် သူ၏ဂစ်တာပညာ တိုးတက်ဖို့အတွက် ကိုယ်တိုင်သာ အားထုတ် လေ့လာခဲ့သည်ဟု သူကပြောပြသည်။ သူတို့ ခေတ်တွင် ဂစ်တာလေ့ကျင့်ရန် Guitar Lessons ခွေများ ရှားပါးသလို Video Tapes များကို ကြည့်၍သာ လေ့ကျင့်ခဲ့ရပြီး ယခုခေတ်တွင်မူ Guitar Lessons ဒီဗီဒီခွေများ အလွယ်တကူ ရရှိနိုင်ပြီး အင်တာနက် ထွန်းကားလာသည့်အတွက် နောက်မျိုးဆက်များ အတွက်လည်း ဂစ်တာပညာကို အဆင်ပြေ ချောမွေ့စွာ လေ့လာဆည်းပူးခွင့် ရရှိနေပြီ ဖြစ်ကြောင်း သူကဆိုသည်။

ဂစ်တာပညာနှင့် အသက်မွေးဝမ်းကျောင်း ပြုနေသည့်အတွက် ဂစ်တာကို အမြဲလိုလို ထိတွေ့တီးခတ်နေရကာ Recording များတွင် တီးခတ်မှုကလည်း သူ့အတွက် လေ့ကျင့်သလို ဖြစ်နေပြီး ညဘက် အိပ်မပျော်သော အခါများတွင်လည်း ဂစ်တာထတီးလေ့ ရှိသည်ဟု သူကပြောပြသည်။

သူ့ဘဝ၏ ဂစ်တာသူရဲကောင်းမှာ ဆရာစောဘွဲ့မှူး ဖြစ်ပြီး မဇ္ဈိမလှိုင်း တီးဝိုင်းမှ ဂစ်တာသမား ဇော်မျိုးထွဋ်ကိုလည်း ကြိုက်နှစ်သက်သလို ကျန်သည့် ဂစ်တာသမားများမှာလည်း သူ့အတွက် မြင်ဆရာ၊ ကြားဆရာများ ဖြစ်သည်ဟု သူကဆိုသည်။ ပြည်ပရှိ ဂစ်တာသမား များထဲမှလည်း သူ၏ ဂစ်တာပညာအတွက် အထောက်အကူ ပြုနိုင်မည့် သူများထံမှ လေ့လာဆည်းပူးလေ့ ရှိသည်ဟု သူက ပြောပြသည်။

ငွေချေးပြီး ဝယ်ရတယ်

ဂစ်တာပညာကို ငယ်စဉ်ကတည်းက ဝါသနာပါသော သူက ကြိုက်နှစ်သက်သော ဂစ်တာများကိုလည်း ဝယ်ယူစုဆောင်းလေ့ ရှိသည်။ သူ့ထံတွင် ကမ္ဘာ့နာမည်ကြီး အမှတ်တံဆိပ် ဂစ်တာများ ဖြစ်သော Fender, Gibson စသော ဂစ်တာများ အပါအဝင် ဂစ်တာပေါင်းများစွာ ပိုင်ဆိုင်ထားပြီး ဖြစ်သော်လည်း ဂစ်တာသမား ဘဝအစတွင် သူပထမဆုံး ပိုင်ဆိုင်ခဲ့ရသော ဂစ်တာလေး အကြောင်းကို ပြန်ပြောင်း ပြောပြသည်။

“အဲဒီတုန်းက ကျွန်တော် ပထမဆုံးဝယ်တာ Electric ဂစ်တာလေး တစ်လုံးပါ။ ဈေးနှုန်းက ၅၇၀၀၀ လောက်ပေးရတယ်။ ဒီငွေပမာဏကို မတတ်နိုင်တဲ့အတွက် သူများဆီက ပိုက်ဆံတွေ လိုက်ချေးပြီး ဝယ်၊ ပြီးမှ တဖြည်းဖြည်း ပြန်ဆပ်ရတာပေါ့” ဟု သူကဆိုသည်။

PTL စတူဒီယို

Iron Cross တီးဝိုင်းနှင့် အောင်မြင်နေသော အချိန်ဖြစ်သည့် ‘၁၉၉၇’ ခုနှစ်တွင် သူ၏ကိုယ်ပိုင် စတူဒီယို ထောင်ရန် အကြောင်း ပေါ်ပေါက်လာခဲ့သည်။ ထိုစဉ်က လင်း၊ မေ၊ စတူဒီယို (D)၊ အိုအေစစ် စသော စတူဒီယိုများတွင် လိုက်လံတီးခတ်ခဲ့ရပြီး ကိုယ်ပိုင်စတူဒီယို ထောင်ရန်ရည်ရွယ်ချက် လုံးဝမရှိခဲ့ဟု သူကဆိုသည်။

ထိုစဉ် သူ၏သူငယ်ချင်းတစ်ဦးက စတူဒီယို ပစ္စည်းများကို ရောင်းချလိုကြောင်း ကြားရသည့်အတွက် စိတ်ဝင်စား၍ မေးမြန်းကြည့်သောအခါ ငွေအရစ်ကျပေး၍ ပစ္စည်းများကို ယူနိုင်ကြောင်း ပြောသောကြောင့် သူယူခဲ့သည်။ ရရှိလာသော ပစ္စည်းများဖြင့် စတူဒီယိုတစ်ခု စတင်ရန် ပြင်ဆင်ဆဲ အချိန်တွင်ပင် စတူဒီယို ပစ္စည်းများကို သူ၏သူငယ်ချင်းနှင့်အတူ ပိုင်ဆိုင်ထားသောသူက ပစ္စည်းများကို အရစ်ကျ ငွေချေစနစ်ဖြင့် မရောင်းလိုဘဲ ငွေတစ်လုံးတည်း လိုချင်သည်ဟု ဆိုကာ ပစ္စည်းများကို ပြန်ယူသွားသည့်အတွက် သူစိတ်ဓာတ်ကျခဲ့ရသည်။ သူစိတ်ဓာတ်ကျသွားမည်ကို မလိုလားသော သူ၏ယောက္ခမ ဖြစ်သူက ပစ္စည်းတန်ဖိုး အားလုံးကို သူ့ကိုယ်စား ပေးချေထားမည်ဖြစ်ပြီး နောက်မှတဖြည်းဖြည်း ပြန်ဆပ်ရန် ပြောသည့်အတွက် စတူဒီယို ပစ္စည်းများကို သူပြန်ယူခဲ့ပြီး PTL စတူဒီယိုကို စတင်တည်ထောင်ခဲ့သည်။

PTL စတူဒီယိုကို ဦးဆောင် တည်ထောင်သော သူကိုယ်တိုင်က အတွေ့အကြုံ နည်းပါးသည့်အတွက် အစပိုင်းတွင် စတူဒီယိုအပေါ် ယုံကြည်မှု နည်းပါးသည့် အဖြစ်မျိုးနှင့် ကြုံခဲ့ရသည်။ သူကိုယ်တိုင်က သမ္ဘာမရှိသည့် စတူဒီယိုများတွင် သွားရောက်တီးခတ်ပါက နောက်ကျောမလုံသလို ခံစားရသည့်အတွက် ထိုကဲ့သို့ ယုံကြည်မှု နည်းပါးခြင်းကို ကိုယ်ချင်းစာသည်ဟု သူကဆိုသည်။

PTL စတူဒီယိုနှင့် ပတ်သက်၍ သူ၏ကြိုးစားချင်စိတ်ကို စေ့ဆော်ပေးသော ဖြစ်ရပ်တစ်ခုကိုလည်း သူက အောက်ပါအတိုင်း ပြောပြသည်။
“အဲဒီတုန်းက ကိုအငဲရဲ့ Unplugged စီးရီးက PTL မှာ အရင်သွင်းတာ။ နောက်မှ သူဘယ်လိုစိတ်ကူး ပေါက်လဲ မသိဘူးပေါ့နော်။ သူ့ကိုကျပ်ပေးတဲ့သူတွေလည်း ရှိရင် ရှိမှာပေါ့။ ပိုက်ဆံ အကုန်အကျခံပြီးမှ မင်းတစ်ခုခု ဖြစ်သွားရင် မလွယ်ဘူးဆိုပြီး ပြောကြမှာပေါ့။ အဲဒီအခွေကြီးကို လင်းစတူဒီယိုမှာ ပြန်သွားသွင်းတယ်။ ဘဝမှာတော့ အဲဒီတစ်ချက်တော့ နည်းနည်းအခံရ အခက်ဆုံးပေါ့နော်။ ဒီမှာသွင်းပြီးခါမှ တခြားနေရာမှာ ပြန်သွားသွင်းရတယ်ဆိုတော့ ကိုယ့်ကိုယုံကြည်မှု မရှိဘူးဆိုတာ သိသွားတယ်။ အဲဒီကနေစပြီး အပြင်းအထန် ကြိုးစားတယ်”

PTL စတူဒီယိုအတွက် ဒစ်ဂျစ်တယ်စနစ်၊ ကွန်ပျူတာစနစ်နှင့် အသုံးပြု အသံသွင်းယူမှု အပိုင်းကို သူစိတ်ဝင်တစား လေ့လာခဲ့သလို အရည်အသွေးမြင့် နောက်ဆုံးပေါ်စက်ပစ္စည်းများ အမြတ်အစွန်းကို အဓိက မထားဘဲ ဝယ်ယူဖြည့်ဆည်းပြီး စေတနာအပြည့်နှင့် လုပ်ဆောင်ပေးခဲ့သည့်အတွက် လူအများ၏ ယုံကြည်မှု ရရှိလာသလို Iron Cross တီးဝိုင်းမှ တေးသံရှင်များကလည်း PTL စတူဒီယိုတွင်သာ အသံသွင်းယူမှုကြောင့် တဖြည်းဖြည်းနှင့် အောင်မြင်မှု ရရှိလာခဲ့သည်ဟု သူကဆိုသည်။

မိသားစု

သူ၏ဇနီးဖြစ်သူမှာ MYC ဘုရားကျောင်းမှ ဒေါက်တာဒေးဗစ်ရုံမို၏ သမီးဖြစ်ပြီး သူ့တွင်သားသမီး သုံးယောက်ရှိနေပြီ ဖြစ်သည်။ သားသမီးသုံးယောက်အနက် အငယ်ဆုံး သမီးဖြစ်သူမှာ သူငယ်စဉ်ကကဲ့သို့ ဂစ်တာတီးခြင်းကို ဝါသနာပါပြီး နေ့ရှိသရွေ့ အမြဲလိုလို လေ့ကျင့်နေလေ့ ရှိသည့်အတွက် ကျန်းမာရေးထိခိုက်မည် စိုးသောကြောင့် ထိုကဲ့သို့ မပြုလုပ်ရန် တားထားရသည်ဟု သူကဆိုသည်။ သားသမီးများနှင့် ပတ်သက်သော သူ၏ဆန္ဒကိုလည်း အောက်ပါအတိုင်း ဖွင့်ဟသည်။

“သားသမီးတွေအပေါ် မျှော်လင့်ချက်ကတော့ အများကြီးမထားပါဘူး။ ကျွန်တော် ဂစ်တာတီးလို့ သူတို့ လိုက်တီးရမယ် ဆိုတာမျိုးတော့ မရှိဘူး။ အဲဒီလို တီးပြီး အောင်မြင်သွားရင်တော့ အတိုင်းထက်အလွန် ပေါ့။ အောင်မြင်မှုဆိုတာလည်း ဘုရားသခင် အလိုတော်ရှိမှလည်း ဖြစ်တာဆိုတော့ ဘုရားသခင်က ဘယ်လို အလိုတော်ရှိမှန်း မသိတော့ သူတို့အပေါ်လည်း မူတည် တာပေါ့နော်”

လူမှုရေး ပိုလုပ်ဖြစ်မယ်

အနာဂတ်တွင် သူဝါသနာပါသော ဂစ်တာကို အမြဲတမ်း တီးခတ်သွားမည် ဖြစ်သလို လူမှုရေးအလုပ် များကို ပိုမိုလုပ်ဆောင်ရန် ရည်မှန်းထားကြောင်း ကိုလည်း သူက အောက်ပါအတိုင်း ဖွင့်ဟသည်။

“ကျွန်တော့်ယောက္ခမ ဒေါက်တာဒေးဗစ်ရုံမို စတင်ပြုလုပ်ခဲ့တဲ့ လူမှုရေးလုပ်ငန်းတွေကို သူ့ကိုယ်စား ကျွန်တော့် အမျိုးသမီးက ဦးဆောင်နေရတယ်။ သူဦးဆောင်တော့ ကိုယ်လည်း ပါရတာပေါ့နော်။ ကျွန်တော်တို့ Church မှာက မူးယစ်ဆေးစွဲ လူငယ်တွေကို အကျင့်စာရိတ္တ ပြုပြင်တဲ့ လုပ်ငန်းရယ်၊ မိဘမဲ့ကလေးတွေကို ပြုစုပျိုးထောင် ပေးတာရယ်၊ အနာကြီး ရောဂါသည်တွေကို ပြုစုပေးတာရယ်တို့ လုပ်နေတယ်။ ရေရှည်မှာတော့ လူမှုရေး လုပ်ငန်းတွေ လုပ်ဖို့ ပိုအားသန်တယ်။

ဂစ်တာတီးတာကတော့ ကိုယ်လည်း ဝါသနာပါတော့ ဆက်တီးသွားမယ်။ ဂစ်တာပညာရပ် တိုးတက်ဖို့ ဆက်လေ့လာချင်စိတ်လည်း ရှိတယ်။ ဒီစိတ်တွေက မကုန်နိုင်ဘူး။ အဲဒီစိတ်တွေ ကုန်သွားတဲ့ တစ်နေ့လည်း ဂစ်တာတီးဖြစ်မှာ မဟုတ်ဘူး။ စိတ်အား ထက်သန်နေမှလည်း ဂစ်တာတီးဖြစ်မှာပါ”

(သန့်ဇင်ဦး)